امبارح أنهى حمزة 6 شهور من عمره بالتمام و الكمال
و بدأ مرحلة جديدة و مثيرة فى حياته و هى مرحلة " الفطام " ...
و الفطام مش معناه انه يستغنى تماما عن الرضاعة زى ماهو مشهور عندنا
لكن معناه انه يبدأ ياكل حاجات تانية و مايعتمدش اعتماد كلى على الرضاعة
و انه يتعود يتناول طعامه بالملعقة و يشرب السوائل بالكوب
.
.
.
.
.
و زى ما قلنا قبل كده ان كل طفل بيمر فى حياته بفترات بيكون متحمس فيها و فضولى انه يجرب حاجة معينة
اسمها الفترات الحساسة
" موضوع الفترات الحساسة للتعلم .. من هنا "
ف انا لاحظت انه فعلا دلوقت هى المرحلة الحساسة عند حمزة لتجربة الاكل
و هو ما يتوافق مع نتائج الابحاث العلمية عن ان انسب وقت لبدء الفطام هو 6 شهور
لان :
- مخزون الحديد فى جسمه بيبدأ يقل ف الوقت ده
- جهازه الهضمى بيبدأ يفرز انزيمات هاضمة جديدة
- يبدأ التسنين
- الطفل بيقدر يقعد مع بعض المساعدة
- الطفل بيقدر يتحكم فى ايده و يستخدمها لاى غرض هو عايزه
.
.
.
.
.
- الوقت المثالى لبداية تقديم الطعام الصلب للطفل هو الشهر السادس، حيث أثبتت بعض الابحاث الحديثة ان الاطفال الذين يبدأون فى تناول الاطعمة الصلبة قبل ذلك يكونون اكثر عرضة للإصابة بأمراض الحساسية مستقبلا.
- البدء فى اعطاء الطفل الاطعمة الصلبة قبل ان يكون جسمه مهيأ لذلك فى الشهور الاولى يصيبه بحساسية لهذا الطعام بصفة خاصة فى المستقبل.
- و من المؤكد ان إعطاء الطفل الوجبات الغذائية غير السائلة قبل ان يكون مستعدا لذلك يسبب له اضطرابات فى الهضم و ربما يؤثر كذلك فى رضاعته الطبيعية.
" من كتاب صحة و سلامة الطفل - للدكتور محمد موفق / بكالوريوس طب و جراحة و ماجستير طب الاطفال "
.
.
.
و علامات الفطام اللى بتظهر ف الوقت دى زى :
- الطفل يبدى اهتمام كبير بعادات تناول الطعام للاشخاص اللى حواليه
- قصر الفترة بين وجبات الحليب التى يطلبها الطفل بالاضافة الى استيقاظه ليلا طلبا للحليب بدلا من استغراقه فى النوم كعادته
-اى حاجة ايد الطفل توصلها بتروح على الفم على طول
" لان الفم فى الوقت ده بيكون اكتر عضو الطفل بيحاول يستكشف بيه العالم من حوله "
و عشان كده .. مش مفروض الام تعتبر مرحلة الفطام مجرد انها تدخل اكل للطفل و خلاص
لازم تبص له من منظور الطفل
و هو ان الاكل ده حاجة جديدة بيكتشفها و خبرة جديدة بيكتسبها
مش حاجة مفروضة عليه يعملها و خلاص
لازم نختار الوقت المناسب للطفل انه ياكل فيه مش الوقت اللى مناسب لينا نكون فاضيين نعمله اكل !
و لازم وقتها نحترم حقوق الطفل كإنسان و نحترم رغبته اذا أبدى رفضه لنوع معين من الاكل مثلا او ابدى رغبته ف انه يكتشف الاكل بإيده و ياكل بنفسه
مش لازم نقابل رفضه بالاصرار و العند انه يخلص وجبته ولا نقابل رغبته دى بمنعه عنها بدعوى انه هايوسخ هدومه !! الحمد لله العلم الحديث اهدى لنا اختراع اسمه غسالة ^_^
.
.
.
مواصفات الاطعمة اللى نبدأ بيها فى بداية الفطام :
1- تكون معتدلة المذاق .. و غالبا احنا مش بنحط ولا ملح ولا سكر لان حاسة التذوق عند الطفل بتكون قوية بيقدر يتذوق الملح او السكر اللى موجود طبيعى ف الاكل و اللى ممكن احنا مانحسش بيه
2- تكون خفيفة القوام سهلة المزج مع حليب الطفل او مع الماء المغلى
3- تكون متجانسة فيكون سهل الطفل يمتصها من المعلقة
4- يفضل ما نبدأش بالاطعمة اللى فيها الجلوتين و دى موجودة فى القمح و الشعير و الشوفان ، لان بعض الاطفال بيتولدوا عندهم حساسية للمادة - نسبة قليلة من الاطفال - دى و ممكن يحصلهم اعراض مرضية سيئة ، و يفضل بعد شهرين من بداية اطعام الطفل
5- ينصح عادة بحبوب الارز كبداية لطيفة لبدء الفطام
6- يمكن للام ان تحضر وجات الطفل بنفسها و هذا افضل طبعا .. و من الاطعمة المناسبة التى يتم تحضيرها فى المنزل :
الخضار المهروس زى الكوسة و البطاطس و الجزر
او الفواكه زى التفاح المطبوخ و الموز
7- يفضل البدء بكميات قليلة من نوع واحد ، و الاستمرار فى اعطاء نفس النوع يوميا بكميات متزايدة و لا نبدأ بإعطاء نوع جديد قبل مرور اسبوع على الاقل و هكذا عند اضافة نوع اخر حتى نتأكد اى الانواع هو الذى يسبب حساسية ان وجدت
طبعا المعلومات و التنبيهات فى موضوع الفطام كتييييرة جدا هاحاول انزلها فى تدوينات قادمة ان شاء الله بس مش عايزة اطول عليكم المرة دى :)
.
.
.
وجبة حمزة الاولى كانت عبارة عن الجزر المهروس
خطأى الاول انى اخترت وقت غير مناسب للوجبة
و حمزة رفض ياكل ف احترمت رغبته و شلت الاكل
و اتضح لى ان رفضه ده لانه كان عايز ياخد غفوة ^_^
" مش باخبى عليكو حاجة اهو .. انا واضحة و صريحة و مباشرة P: "
و بعد ما نام حوالى نص ساعة صحى لوحده و جربت عرضت عليه الاكل من جديد و الحمد لله كانت تجربة ناجحة
بدأ يشد منى المعلقة عشان ياكل بنفسه
.jpg)
ف جبت له معلقة صغيرة مناسبة لإيده
" معلقة فطام الطفل "
اول اتنين على اليمين للفطام نفس حجم المعلقة بس مختلفين فى طول الايد فرق بين ايدى و ايد حمزة
و الاكبر منها معلقة الشاى و الاكبر معلقة الطعام بتاعتنا العادية
و بقيت احط له فيها الجزر المهروس و هو يحطها ف بؤه
و كل ما ينجح انه ياكل كنت اسقف له و هو كان يضحك و يبقى مبسوط
و دى كانت اولى خطوات انه يتعلم ياكل لوحده و يعتمد على نفسه ان شاء الله
ده غير انه قبل ما ينام بالليل حب يشاركنى التفاحة بتاعتى ^_^
.
.
.
.
.
نكتفى بهذا القدر اليوم
و طريقة الفطام الكاملة على طريقة منتسورى هانزلهالكم فى تدوينة قادمة ان شاء الله
ليست هناك تعليقات:
إرسال تعليق